Makleri öldürən Yusif Rəhimov və 32 yaşlı dayısı Tehran Rəşidovun apellyasiya şikayəti təmin edilməyib. Sumqayıt24 bu haqda 23 fevral tarixində Pravda.az-a istinadən xəbər verir.
Müvafiq qərar Sumqayıt Apellyasiya Məhkəməsində hakim Elman Əhmədovun sədrliyi ilə keçirilən prosesdə qəbul edilib.
Qeyd edək ki, hadisə 2020-ci il dekabrın 18-də Sumqayıtın H.Z. Tağıyev qəsəbəsində qeydə alınıb.
Qəsəbədə "Əvəz” adı ilə məşhurlaşan Xanəli Əmirov makler kimi tanınıb. O, təqsirləndirilən şəxslərlə əvvəldən normal münasibətdə olub. Daha əvvəl X. Əmirovun vasitəçiliyi ilə Yusif Rəhimovun atasına aid ev satılıb. Yusifin dayısı Tehranın isə həmin maklerə 1100 manat borcu olub. Tehran borclu olduğu şəxsdən canını qurtarmaq üçün narkotik aludəçiliyindən əziyyət çəkən bacısı oğluna Xanəlini öldürməyi təklif edib və birgə plan qurublar.
Qətl günü Yusif Xanəli ilə yeyib-içmək məclisi təşkil edib, sonradan onlara Tehran da qoşulub. Məclisdən sonra Yusif maklerdən ona kirayə ev verməsini xahiş edib. Onlar birlikdə evə baxmağa gediblər. Burada Yusif sərxoş halda olan Xanəliyə arxadan çoxsaylı zərbələr endirib. Dayısı isə meyiti xalçaya bükərək evdən çıxarmaqda, həmçinin divarın qana bulanmış hissəsini yumaqda kömək edib.
Onlar meyiti Tehranın "Opel” markalı avtomobilinə qoyaraq 19 nömrəli məktəb binasının zirzəmisinə atıblar. Daha sonra cəsədi yandıraraq izi itirməyə çalışıblar.
X.Əmirovun itkin düşməsindən sonra təxminən 2 ay müddətində axtarışlar aparılıb. Nəticədə onun qətlə yetirildiyi müəyyən edilib. Martın 15-də Yusif Rəhimov və Tehran Rəşidov saxlanılıb və törətdikləri əməli etiraf ediblər.
Sumqayıt Ağır Cinayətlər Məhkəməsinin hökmü ilə dayı 19 il, onun bacısı oğlu isə 18 il 6 ay müddətinə həbs olunublar.
