Sumqayıt şəhərini elektrik enerjisi ilə təchiz edən yüksək gərginlikli hava xətlərinin metal dayaqları oğurlanıb. Sumqayıt24 bu barədə 6 oktyabr tarixində Daxili İşlər Nazirliyinin Mətbuat Xidmətinə istinadən xəbər verir.
Oğurluq hadisəsi elektrik dayaqlarının Abşeron rayonu ərazisindən keçən hissəsində baş verib. Qobu Polis Bölməsinin əməkdaşları tərəfindən dərhal araşdırmalara başlanılıb. Həyata keçirilən əməliyyat nəticəsində əməlləri törətməkdə şübhəli bilinən iki qardaş - Bahadur və Əfrail Zahidov saxlanılıblar. Onlar oğurladıqları hissələri Binəqədi rayonunda yerləşən metal qəbulu məntəqəsinə satıblar.
Əməliyyat tədbirlərinin davamı olaraq, oğurluq olduğunu bilə-bilə həmin metal hissələri alan məntəqə sahibləri Murad və Sülhəddin Bəhramov qardaşları da tutulublar. Obyektə baxış zamanı elektrik dirəklərinin metal hissələri aşkar olunaraq maddi sübut kimi götürülüb.
Faktla bağlı toplanan materiallar Abşeron Rayon Polis İdarəsinin İstintaq Şöbəsinə göndərilib. [modula id="24556"]
