Özünü seyid kimi təqdim edərək vətəndaşlara qarşı dələduzluq etməkdə təqsirləndirilən şəxsə Sumqayıtda hökm oxunub. Bu haqda 7 iyul tarixində Sumqayıt24 xəbər verir.
Məlumata görə, Rəvan Sadıqov (ad və soyad şərtidir), tanışı Samir Sarıyevi (ad və soyad şərtidir) bəxtinin bağlandığına inandırıb və 900 manat müqabilində onu bəd dualardan azad edəcəyini vəd edib. Bu səbəbdən 2019-cu ilin oktyabr ayında Samirin 600 manatını ələ keçirib.
Bundan başqa, o, tanışı ilə cinayət əlaqəsinə girərək Gimnaziya direktorunun müavini vəzifəsində çalışan şəxsin müqaviləsinin müddətinin uzadılmasına köməklik edəcəklərinə, sonradan isə aralarında əldə olunmuş “razılaşmaya” əsasən onu ayrı bir məktəbə direktor vəzifəsinə təyin edilməsinə köməklik edəcəklərinə dair yalan vəd verib. Buna aldanan zərərçəkmiş şəxs ona 17.550 manat verib.
Əslən Ağcabədidən olan 30 yaşlı Rəvan Sadıqovun növbəti qurbanı, öz tanışı Vüsal Hümbətov (ad şərtidir) olub. O, Vüsala, barəsində “dua” yazmaqla Memarlıq və İnşaat Universitetində qabiliyyət imtahanından keçirəcəyini vəd edib. Rəvan özünü seyid kimi təqdim edərək ondan 5500 manat məbləğində pul alıb.
Bundan başqa, Rəvan Sadıqov istintaqa məlum olmayan mənbədən, ümumi çəkisi 7,009 qram olan psixotrop maddəni saxlamaqda təqsirli bilinib.
Sumqayıt Şəhər Məhkəməsinin qərarı ilə Rəvan Sadıqov 1 il 3 ay müddətinə azadlıqdan məhrum edilib.
