Sumqayıtda qətl hadisəsi törətməkdə ittiham olunan 34 yaşlı Habil Qonşəliyevin cinayət işi üzrə ibtidai istintaq başa çatıb. Bu haqda 25 may tarixində Sumqayıt24 Demokrat.az-a istinadən məlumat verir.
İş baxılması üçün Sumqayıt Ağır Cinayətlər Məhkəməsinə göndərilib. Hakim Nurəddin Hüseynlinin icraatında keçirilən məhkəmənin hazırlıq iclası iyunun 5-nə təyin edilib.
Xəbər verdiyimiz kimi, bu ilin fevral ayında itkin düşmüş Sumqayıt sakini, 48 yaşlı Rüfət Abdullayevin üzərində xəsarət izləri olan meyiti aşkarlanıb.
Aparılan araşdırma zamanı Rüfət Abdullayevin aralarında yaranmış mübahisə zamanı H. Qonşəliyev tərəfindən yumruq və təpiklə yetirilmiş xəsarətlər nəticəsində ölməsinə əsaslı şübhələr müəyyən edilib.
Hadisəni törədən Habil Qonşəliyevin barəsində Cinayət Məcəlləsinin “quldurluq, hədə-qorxu ilə tələb etmə, terrorçuluq və ya banditizmlə əlaqədar adam öldürmə” maddəsi ilə ittiham elan edilib.
