7 yaşlı uşağı öldürən Mehman Xəlilovun barəsindəki hökmdən apellyasiya şikayəti verilib. Sumqayıt24 bu haqda 22 aprel tarixində Pravda.az-a istinadən xəbər verir.
Şikayət Sumqayıt Apellyasiya Məhkəməsinin hakimi Məhəmmədəli Rzayevin sədrliyi ilə araşdırılacaq. Məhkəmənin növbəti iclası aprelin 25-nə təyin edilib.
Xatırladaq ki, Sumqayıt Ağır Cinayətlər Məhkəməsinin hökmü ilə Mehman Xəlilov 19 il müddətinə həbs olunub.
İttihama görə, hadisə ötən il aprelin 29-da baş verib. 2016-cı il təvəllüdlü Fərid Bakarov Sumqayıt Şəhər Uşaq Xəstəxanasında ölüb. Prokurorluğun ilkin araşdırması zamanı 1994-cü il təvəllüdlü Mehman Xəlilovun Sumqayıtda sambo üzrə məşq vaxtı uşağa xəsarətlər yetirməsi, sonuncunun həmin xəsarətlərdən ölməsinə əsaslı şübhələr müəyyən edilib.
Sumqayıt Şəhər Prokurorluğunda Cinayət Məcəlləsinin 126.3-cü (qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanıb. Mehman Xəlilov şübhəli şəxs qismində tutulub.
Sumqayıt Şəhər Məhkəməsində məşqçi barəsində dörd aylıq həbs qətimkan tədbiri seçilib. Təqdimata baxılarkən Xəlilov özünü təqsirli bilmədiyini, uşağın ölümündə günahkar olmadığını deyib.
Mehman Xəlilov ilkin olaraq Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) maddəsi ilə təqsirli bilinib. Daha sonra ona Cinayət Məcəlləsinin 120.2.9-cu (təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı adamöldürmə) maddəsi ilə ittiham irəli sürülüb.
