Sumqayıtda qətl törətməkdə təqsirli bilinən 28 yaşlı Sənan Hacının məhkəmə prosesi yekunlaşıb. Sumqayıt24 bu barədə 10 noyabr tarixində Qafqazinfo.az-a istinadən xəbər verir.
O, 30 yaşlı Tural Abdulovu bıçaqlayaraq qətlə yetirdiyinə görə məhkəmənin hökmü ilə Cinayət Məcəlləsinin “Xuliqanlıq niyyəti ilə adam öldürmə” və “Xuliqanlıq – silah tətbiq etməklə” maddələri ilə təqsirli bilinərək 18 il 6 ay müddətinə həbs cəzasına məhkum edilib.
Araşdırmalar zamanı məlum olub ki, T.Abdulov Sumqayıtda biznes fəaliyyəti ilə məşğul olub və 3 yerdə şərab mağazası işlədib. Hadisə baş verən gün T.Abdulov avtomobil ilə Sənanın və yanındakı digər 2 nəfərin qarşısından keçib. Bu zaman avtomobildə sərnişin qismində qız da olub. Həmin qızın onlara qarşı söyüş işlətdiyini deyən Sənan fit çalaraq və qışqıraraq maşını saxladıb və mübahisə baş verib. Həmin vaxt ərazidə polislər olduğu üçün tərəflər mübahisəni qısa vaxtda bitirərək uzaqlaşıblar. Lakin Sənan və dostları bir qədər sonra yenidən həmin yerə - T.Abdulovun işlətdiyi mağazanın yaxınlığına gəliblər. Bu zaman mübahisə münaqişəyə çevrilib və Sənan Hacı Turalın ürək nahiyəsinə bıçaqla zərbələr endirərək onu qətlə yetirib.
Hadisə ötən il oktyabrın 10-u, şəhərin 5-ci mikrorayon ərazisində qeydə alınıb.
