Sumqayıtda nənəsi Qənirə Mehdixanlını iplə boğaraq qətlə yetirən 28 yaşlı Nicat Əliyevin cinayət işi üzrə məhkəməsi yekunlaşıb. Bu haqda 3 oktyabr tarixində Sumqayıt24 Pravda.az-a istinadən məlumat verir.
Proses Sumqayıt Ağır Cinayətlər Məhkəməsində keçirilib. N.Əliyev Cinayət Məcəlləsinin “Qəsdən adam öldürmə” maddəsi ilə təqsirli bilinib. Hökmə əsasən, ona 10 il müddətinə həbs cəzası təyin edilib.
Məhkəmədə bildirilib ki, N.Əliyev uzun müddət ailəsi ilə Türkiyədə yaşayıb və 2021-ci ildə, nənəsi Q.Mehdixanlı koronavirusa yoluxandan sonra ölkəyə qayıdaraq nənəsi ilə birgə yaşamağa başlayıb. Hadisədən 6-7 ay əvvəldən etibarən nənə ilə nəvənin münasibətləri pozulubmuş. Buna səbəb Nicatın mərc oyunlarına meyilli olması, nənəsinə məxsus notbuku gizli götürərək satması, qonşuda yaşayan sevdiyi qızdan 3 min manat borc pul alması və sairə olub.
Qeyd edək ki, QHT rəhbəri kimi tanınan 84 yaşlı Qənirə Mehdixanlı həm də Aşıqlar Birliyinin Sumqayıt şöbəsinin rəhbəri imiş. O, Sumqayıtda 60 ilə yaxın pedaqoji fəaliyyət göstərib.
