Sumqayıtda nişanı qaytarmaq istəyən qızı öldürüb, anasını ağır yaralayan şəxsə hökm oxunub. Sumqayıt24 bu haqda, bu gün 23 fevral tarixində İTV-yə istinadən xəbər verir.
Hadisə 4 sentyabr 2020-ci il tarixində, H.Z. Tağıyev qəsəbəsində baş verib. Beləliklə, 2 uşağını və yoldaşını atan Valeh İskəndərov qonşuluqda, yataqxanada yaşayan 20 yaşlı Mehriban Cabbarova ilə nişanlanıb.
Lakin çox çəkmədən, onun davranış və hərəkətlərindən qorxan qız ailə qurmaq istəmədiyini dilə gətirib. Onlar arasında qanla nəticələnən mübahisə başlayıb.
Məlumata görə, Valeh İskəndərov Mehribanı və onun anasını bıçaqlayıb. Nəticədə qız ölüb.
Daha sonra o, hadisə yerindən qaçmaq istəyərkən saxlanılıb. Valeh İskəndərov 19 il müddətinə həbs olunub.
Qeyd edək ki, İskəndərovun yoldaşı qonşu qızla münasibəti olduğu üçün uşaqları da götürərək evi tərk edib.
