Novxanı sakini qanunsuz silah satmaq istəyib. Sumqayıt24 bu haqda 5 iyul tarixində Daxili İşlər Nazirliyinə (DİN) istinadən xəbər verir.
Saray Polis Bölməsinin əməkdaşları tərəfindən qəsəbədə əməliyyat keçirilib. Nəticədə Emin Əliyev adlı şəxs saxlanılıb. Onun üzərində 1 ədəd “Makarov” markalı tapança, 5 ədəd patron və sandıqça aşkar edilib.
E. Əliyev odlu silah-sursatı bir neçə ay bundan əvvəl əldə etdiyini, lakin polisə təhvil verməyərək satmaq üçün saxladığını bildirib.
Faktla bağlı toplanan materiallar Abşeron Rayon Polis İdarəsinin İstintaq Şöbəsinə göndərilib. Əməliyyat-istintaq tədbirləri davam etdirilir.
Qeyd edək ki, E. Əliyev əvvəllər dəfələrlə məhkum olunub.
