Sumqayıtda bank kartlarından oğurluq edən qadın saxlanılıb. Sumqayıt24 bu haqda 1 mart tarixində Daxili İşlər Nazirliyinə (DİN) istinadən xəbər verir.
Naməlum şəxs zərərçəkənin etibarından sui-istifadə edərək onun kartında olan 250 manatı ələ keçirib. Kart sahibi 1-ci Polis Bölməsinə müraciət edərək bildirib ki, bankomatın qarşısında olan zaman kartından pul çıxarmaq üçün 1 nəfərə müraciət edib. Həmin şəxs kartı bankomata daxil edəndən sonra yalandan hesabda pul olmadığını deyib. Zərərçəkmiş uzaqlaşandan sonra isə bankomatdan çıxan pulu götürərək gedib.
Polis əməkdaşlarının keçirdikləri əməliyyat nəticəsində şübhəli qismində əvvəllər məhkum olunmuş Aysel Əliyeva tutulub. O, etdiyi cinayəti və daha bir nəfərin 120 manatını eyni üsulla oğurladığını etiraf edib. O, əsasən, ahıl şəxslərin təqaüd kartlarından oğurluq edib.
Faktlarla bağlı araşdırmalar aparılır. A. Əliyevanın Sumqayıt, eləcə də digər ərazilərdə digər analoji cinayətlər etdiyi istisna olunmur. Onun əməllərindən zərərçəkən başqa vətəndaşlar varsa, ərazi polis orqanlarına, “102” Zəng Mərkəzinə və Nazirliyin sosial şəbəkələrdəki rəsmi səhifələrinə məlumat verə bilərlər.
