Polis əməkdaşlarının keçirdikləri əməliyyat tədbirləri zamanı 4 narkokuryer saxlanılıb. Bu haqda 29 yanvar tarixində Sumqayıt24 Daxili İşlər Nazirliyinə (DİN) istinadən məlumat verir.
Əməliyyat tədbirləri Xırdalan şəhəri, Novxanı, Məmmədli və Hökməli qəsəbələrində keçirilib. Nəticədə narkotiklərin qanunsuz dövriyyəsində şübhəli bilinən Əli Babayev, Nərgiz Həsənova, Nadir Məmmədov və Səbir Məmmədov saxlanılıblar.
Onlarda, idarə etdikləri avtomobillərdə və yaşadıqları evlərdə 9 kiloqram marixuana, 4 kiloqram heroin, 2 kiloqram psixotrop maddə metamfetamin və 50 ədəd satışı qadağan edilən metadon həbi olmaqla ümumilikdə 15 kiloqram narkotik maddə aşkar olunub.
Saxlanılan şəxslər ölkəyə İrandan qaçaqmalçılıq yolu ilə gətirilən narkotikləri Bakı şəhəri və Abşeron rayonunda ayrı-ayrı şəxslərə çatdırıb pul qazanmaq məqsədilə əldə etdiklərini bildiriblər.
Faktla bağlı cinayət işləri başlanılıb. Əməliyyat-istintaq tədbirləri davam etdirilir.
