7 yaşlı uşağı öldürməkdə ittiham olunan idman müəlliminin məhkəmə istintaqı yekunlaşıb. Sumqayıt24 bu haqda 15 fevral tarixində Apa.az-a istinadən xəbər verir.
Sumqayıt Ağır Cinayətlər məhkəməsində hakim Fəhmin Hümbətovun sədrliyi ilə keçirilən prosesdə prokuror Samir Məmmədov çıxış edib. Dövlət ittihamçısı Mehman Xəlilovun 20 il müddətinə həbs edilməsini istəyib.
Xəlilovun vəkili çıxış üçün məhkəmədən vaxt istəyib. Proses martın 14-də davam etdiriləcək.
Hadisə ötən ilin aprel ayında baş verib. 2016-cı il təvəllüdlü Fərid Bakarov Sumqayıt Şəhər Uşaq Xəstəxanasında ölüb. İlkin araşdırma zamanı 1994-cü il təvəllüdlü Mehman Xəlilovun məktəblərdən birində sambo üzrə məşq zamanı uşağa xəsarətlər yetirməsinə, sonuncunun həmin xəsarətlərdən ölməsinə əsaslı şübhələr müəyyən edilib.
Sumqayıt şəhər prokurorluğunda Cinayət Məcəlləsinin 126.3-cü (qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanıb. Mehman Xəlilov şübhəli qismində tutulub.
Xatırladaq ki, Sumqayıt Şəhər Məhkəməsində Mehman Xəlilov barəsində 4 aylıq həbs qətimkan tədbiri seçilib. Təqdimata baxılarkən Mehman Xəlilov özünü təqsirli bilmədiyini, uşağın ölümündə günahkar olmadığını deyib.
O, ilkin olaraq Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) maddəsi ilə təqsirli bilinib. Daha sonra ona qarşı CM-nin 120.2.9-cu (təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı adam öldürmə) maddəsi ilə ittiham irəli sürülüb.
