Rüşvət almaqda ittiham olunan sabiq hakim İlyas Mahmudovun cinayət işi üzrə məhkəmə araşdırması yekunlaşıb. Bu haqda 18 dekabr tarixində Sumqayıt24 Qafqazinfo-ya istinadən məlumat verir.
Hakim Fəhmin Hümbətovun sədrliyi ilə Sumqayıt Ağır Cinayətlər Məhkəməsində keçirilən sonuncu iclasda hökm oxunub. Hökmə əsasən, İ.Mahmudov verilmiş ittihamla təqsirli bilinərək 9 il müddətinə azadlıqdan məhrum edilib.
Müttəhim kürsüsündə əyləşən sabiq hakim özünü təqsirli bilməyib, son sözündə məhkəmədən bəraət tələb edib.
Qeyd edək ki, 2008-2019-cu illərdə Sumqayıt Şəhər Məhkəməsinin hakimi işləmiş İlyas Mahmudov 2022-ci ildə Baş Prokuror yanında Korrupsiyaya qarşı Mübarizə Baş İdarəsi tərəfindən həbs edilib.
Daha əvvəl sabiq hakimə qarşı Cinayət Məcəlləsinin 295.1, 308.2, 311.3.2 və 313-cü maddələri ilə ittiham irəli sürüldüyü haqda məlumat vermişdik.
