Sumqayıtda qızını boğaraq öldürən ataya hökm oxunub. Sumqayıt24 bu barədə 31 oktyabr tarixində Oxu.az-a istinadən xəbər verir.
Hakim Hafiz Əliyevin sədrliyi ilə Sumqayıt Ağır Cinayətlər Məhkəməsində keçirilən prosesdə qızını qətlə yetirməkdə təqsirləndirilən Salam Cəfərova hökm oxunub. O, 9 il 6 ay müddətinə azadlıqdan məhrum edilib.
Xatırladaq ki, bu il fevralın 15-də Sumqayıt şəhər sakini, 38 yaşlı Zəminə Mehtiyevanın öldürülməsi faktı ilə bağlı Sumqayıt Şəhər Prokurorluğuna məlumat daxil olub.
Aparılan araşdırmalarla zərərçəkmişin atası Salam Cəfərovun şəxsi münasibətlər zəminində aralarında yaranmış münaqişə zamanı Zəminə Mehtiyevanı elektrik naqillə boğaraq qəsdən öldürməsinə əsaslı şübhələr müəyyən edilib.
Faktla bağlı prokurorluqda “qəsdən adamöldürmə” maddəsi ilə cinayət işi başlanılıb. S. Cəfərov şübhəli şəxs qismində tutularaq istintaqa cəlb edilib.
Məhkəmədə ifadə verən təqsirləndirilən şəxs deyib ki, qızını namus üstündə öldürüb. O bildirib ki, Zəminə Mehtiyeva öz həyat yoldaşı ilə birlikdə yaşamasa da, boşanmayıb. S. Cəfərov söyləyib ki, qızının kirvəsinin oğlu ilə sevgi münasibətləri olub, bir neçə dəfə qadını gecə vaxtı həmin şəxsin avtomobilinə minib-düşdükdə görüb.
