Gənc cüdoçu Turan Rüstəmovu öldürən Sumqayıt sakini Ruslan Səfixanovun cinayət işi üzrə məhkəmə iclası keçirilib. Sumqayıt24 bu haqda 5 iyun tarixində Report.az-a istinadən xəbər verir.
Bakı Ağır Cinayətlər Məhkəməsinin hakimi Rasim Sadıxovun sədrliyi ilə keçirilən prosesdə vəkillər müdafiə çıxışı ediblər.
Vəkil Adəm Məmmədov müvəkkili Səfixanovun ittiham olunduğu Cinayət Məcəlləsinin 120.2.2-ci (qəsdən adam öldürmə, xuliqanlıq niyyəti ilə adam öldürmə) maddəsinin 126.3-cü (qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda) maddəsinə tövsif edilməsini istəyib.
Onun sözlərinə görə, tibbi ekspertiza onu göstərib ki, R. Səfixanov mərhum T. Rüstəmova yalnız 2 bıçaq zərbəsi vurub, ondan biri isə ölümcül olub.
Zərərçəkmiş şəxsin vəkili Fərhad Məmmədov və mərhumun anası Sevinc Xəlilova isə məhkəmədən R. Səfixanova ömürlük həbs cəzası tələb ediblər.
Təqsirləndirilən şəxs son söz üçün vaxt istəyib. Məhkəmənin növbəti iclası iyunun 13-dək təxirə salınıb.
Xatırladaq ki, prokuror Rauf Malışov R. Səfixanovun 20 il müddətinə azadlıqdan məhrum edilməsini istəmişdi.
Qeyd edək ki, hadisə ötən ilin noyabrında Şağan qəsəbəsində yerləşən idman arenasında baş verib.
Belə ki, Sumqayıt şəhər sakini, 21 yaşlı R. Səfixanov mübahisə zamanı Yevlax rayon sakini, 16 yaşlı T. Rüstəmovu bıçaqlayaraq öldürüb.
