Sumqayıtda keçmiş polis rəisini avtomobillə vuraraq öldürən 37 yaşlı Timur Məmmədovun barəsindəki hökmdən verilən apellyasiya şikayəti üzrə məhkəmə iclası yekunlaşıb. Bu haqda 2 fevral tarixində Sumqayıt24 Pravda.az-a istinadən məlumat verir.
İşə Sumqayıt Apellyasiya Məhkəməsində baxılıb. Hakim Azər İsmayılovun sədrliyi ilə keçirilən prosesdə qərar elan olunub. Qərara əsasən, şikayət təmin edilməyib.
Sumqayıt Şəhər Məhkəməsinin hökmü ilə T.Məmmədova 2 il sürücülük hüququ məhdudlaşdırılmaqla 5 il 1 ay həbs cəzası verilib. O, məhkəmə zalındaca həbs edilib.
Xatırladaq ki, hadisə 2022-ci ilin oktyabr ayında Sumqayıt bulvarında baş verib. Polis polkovniki Çingiz Alxanlı Bakı Şəhər Baş Polis İdarəsinin Maliyyə İdarəsinin keçmiş rəisidir. O, dünyaşöhrətli “Fika Montino” brendinin yaradıcısı Fikrət Allahverdiyevin qudası olub.
