Sumqayıtda vəzifəli şəxsi öldürən Murad Kazımovun məhkəməsi yekunlaşıb. Sumqayıt24 bu haqda 1 avqust tarixində Apa.az-a istinadən xəbər verir.
Sumqayıt Ağır Cinayətlər Məhkəməsinin hakimi Nurəddin Hüseynlinin sədrliyi ilə keçirilən prosesdə ona hökm oxunub. Murad Kazımov 16 il müddətinə azadlıqdan məhrum edilib.
Qeyd edək ki, dövlət ittihamçısı Samir Məmmədov təqsirləndirilən şəxs üçün 17 il həbs istəmişdi.
Hadisə 2022-ci ilin dekabrında baş verib. 9-cu mikrorayon ərazisində 2003-cü il təvəllüdlü M. Kazımovun 1975-ci il təvəllüdlü Mahir Allahverdiyevi qətlə yetirməsinə dair əsaslı şübhələr müəyyən edilib. Kazımov saxlanılaraq istintaqa təhvil verilib.
Ona qarşı Cinayət Məcəlləsinin 120.2.4 (qəsdən adam öldürmə, xüsusi amansızlıqla qəsdən adam öldürmə) maddəsi ilə ittiham elan olunub.
Xatırladaq ki, Mahir Allahverdiyev Qubadlı rayonu, Xocamusaqlı kənd inzibati nümayəndəliyi sədrinin müavini idi. O, şəhid Vüsal Allahverdiyevin əmisi olub.
