22 yaşlı Sumqayıt sakini şantaj edilir. Sumqayıt24 bu haqda 2 may tarixində xəbər verir.
S. Əkbərova (şərti) Yasamal Rayon Polis İdarəsinin 29-cu Polis Şöbəsinə müraciət edərək bildirib ki, Türkiyənin Kayseri şəhərində fəaliyyət göstərən Azərbaycanlı Tələbələr Birliyinin rəhbəri Əlixan Məhərrəmli onu şantaj edir və 20 min dollar verməsini tələb edir.
Kayseridəki universitetlərdən birində təhsil alan tələbə qıza edilən şantaj Türkiyədə yaşayan Berat (şərti) adlı şəxslə əlaqələri ilə bağlıdır. İddia edilir ki, Berat qanunazidd fəaliyyəti ilə tanınır. Belə ki, ərizəyə əsasən, QHT rəhbəri gənc xanıma cinayət aləminin üzvü ilə münasibətlərinin olmasını universitet rəhbərliyinə bildirəcəyini deyib.
Daxili İşlər Nazirliyindən məsələ ilə bağlı Qafqazinfo.az-a açıqlama verilib. Mətbuat Xidmətinin əməkdaşı Nurlan Əliyevin sözlərinə görə, Əlixan Məhərrəmli Bakıda saxlanılıb:
"Onun barəsində cinayət məcəlləsinin 182-ci (hədə-qorxu ilə tələb etmə) maddəsi ilə cinayət işi açılıb. Məhkəmənin qərarı ilə 3 ay həbs qətimkan tədbiri seçilib. Yasamal RPİ-də istintaq araşdırmaları davam etdirilir".
Qeyd edək ki, Ağcabədi rayon sakini olan 1997-ci il təvəllüdlü Əlixan Məhərrəmli 2018-ci ildən Kayseri Şəhəri Azərbaycanlı Tələbələr Birliyinin sədri və 2020-ci ildən Kayseri Türk Dünyası Tələbələr Birliyinin sədridir.
