Saray qəsəbəsində xüsusi amansızlıqla adam öldürən və döyən şəxs həbs edilib. Sumqayıt24 bu haqda 21 iyun tarixində Qafqazinfo.az-a istinadən xəbər verir.
Sumqayıt Ağır Cinayətlər Məhkəməsində 29 yaşlı Vüqar Nemətovla bağlı hökm oxunub. Məhkəmənin qərarı ilə o, 19 il müddətinə azadlıqdan məhrum olunub.
Hadisə ötən ilin oktyabrında ailənin yaşadığı ünvanda qeydə alınıb. Həmin gün Vüqar sərxoş olarkən 2015-ci il təvəllüdlü qızını dəmir boru ilə döyüb. Onu sakitləşdirməyə çalışan həyat yoldaşı Səidə Nemətovanı isə dəmir parçası ilə döyərək öldürüb.
Müəyyən edilib ki, Vüqar işdən evə gələn zaman evlərinin yaxınlığında yerləşən marketin kassiri ona azyaşlı qızının iki gün əvvəl mağazadan 37 manatlıq oğurluq etdiyini deyib. O, kamera görüntülərinə baxdıqdan sonra evə gəlib.
Uşaq atasına şokolad, qələm, dəftər, karandaş götürdüyünü etiraf edib. Bundan sonra Nemətov xalası oğlugilə gedərək ondan borc istəyib. Lakin müsbət cavab ala bilməyib və mağazaya qayıdıb. Orada maaş alacağını və qızının borcunu qaytaracağını desə də, təklifi qəbul edilməyib. Bundan sonra ata yenidən evə gedib və qanlı hadisəni törədib.
Məhkəmədə təqsirləndirilən şəxs özünü ittiham üzrə təqsirli bilərək ifadə verməkdən imtina edib.
Qeyd edək ki, 11 ildir ailəli olan Səidə Nemətova 26 həftəlik hamilə idi.
