Sumqayıtda saxlanılan “İctimai Nəzarət Koalisiyası”nın sədrinin törətdiyi cinayətlərin detalları açıqlanıb. Sumqayıt24 bu haqda Oxu.az-a istinadən xəbər verir.
Daxili İşlər Nazirliyində aparılan araşdırma zamanı məlum olub ki, Rasim Məmmədov bir çox adama ziyan vurub. O, insanlardan dələduzluq və hədə-qorxu yolu ilə pul tələb edib.
Onun əməllərindən zərər çəkən iş adamları və müharibə qaziləri nazirliyə şikayətlər ünvanlayıblar.
Məlumata görə, Məmmədov 1-ci Qarabağ müharibəsi qazisi Sevgili Rəsulovdan dələduzluqla 6 min manat pul alıb. O, Rəsulova tikintisi yarımçıq qalan evinin tamamlanacağını vəd edərək, sözündən boyun qaçırıb.
Həmçinin o, Sumqayıtda Nəsimi Məmmədov adlı vətəndaşdan 8 min manat alıb. Rasim, bu səfər vətəndaşa Tağıyev qəsəbəsindəki obyekt üçün yararlı olan yarımtikilinin alınmasını söz verib, amma yenə də verdiyi sözdən yayınıb.
Bundan başqa, Rasim Məmmədov şəhərimizdə fəaliyyət göstərən obyektlərdən aylıq icarə haqları alıb. O, bu əməlini 2013-cü ildən həbs edilən günədək davam etdirib.
İnşaatçılar qəsəbəsindəki “Az-Lead” MMC-nin direktor müavini işləyən Türkiyə vətəndaşı Uğur Dəniz də eyni cinayətlə üzləşib. Dənizin sözlərinə görə, saxlanılan şəxs onu və zavodun rəhbərliyini televiziya və internet vasitəsilə rüsvay edəcəyi ilə hədələyərək 1500 manat pul alıb.
Xatırladaq ki, Məmmədov fevralın əvvəli saxlanılıb.
