Sumqayıt şəhər 2 saylı şəhər xəstəxanasının sabiq baş həkimi Ramiz Həmzəyevə hökm oxunub. Bu haqda 12 dekabr tarixində Sumqayıt24 Apa.az-a istinadən məlumat verir.
Məhkəmə prosesi Sumqayıt şəhər məhkəməsində hakim Rövşən Xəlilovun sədrliyi ilə keçirilib.
Vəzifə səlahiyyətlərindən sui-istifadədə təqsirləndirilən şəxs Cinayət Məcəlləsinin 308.1-ci maddəsi ilə təqsirli bilinərək qazancından 15 faiz dövlət nəfinə tutulmaqla 2 il müddətinə islah işləri cəzasına məhkum edilib. Ramiz Həmzəyev Cinayət Məcəlləsinin 313-cü maddəsinə əsasən, təqsirli bilinib, lakin barəsində başlanmış cinayət işinə cinayət məsuliyyətinə cəlbetmə müddəti bitdiyinə görə xitam verilib.
İttihama görə, Sumqayıt 2 nömrəli şəhər xəstəxanasının baş həkimi işləmiş Ramiz Həmzəyev vəzifəli şəxs qismində xidməti vəzifələrinin icrası ilə əlaqədar özü və üçüncü şəxslər üçün qanunsuz üstünlük əldə etmək məqsədilə dövlətin qanunla qorunan mənafelərinə vahid niyyətlə mühüm zərər vurmaqla səlahiyyətlərindən sui-istifadə edib, rəsmi sənədlərə bilə-bilə yalan məlumatları daxil edib.
Belə ki, o, əlillik dərəcəsi almaq üçün müraciət etmiş şəxslərin adına xəstəxanada stasionar müalicə almaları barədə müxtəlif diaqnozlar qeyd edilməklə saxta sənədlər verib. Bununla da Cinayət Məcəlləsinin 308.1-ci maddəsində nəzərdə tutulan cinayət əməllərini törətməkdə təqsirli bilinib.
