Tələbə qızı oğurlayan Sadiq Nəbiyevin (şərti) kassasiya şikayətinə baxılıb. Sumqayıt24 bu haqda 24 aprel tarixində Pravda.az-a istinadən xəbər verir.
Ali Məhkəmədə hakim Şahin Yusifovun sədrliyi ilə keçirilən prosesdə qərar elan olunub. Onun şikayəti təmin edilməyib.
Qeyd edək ki, Sumqayıt Ağır Cinayətlər Məhkəməsinin hökmü ilə Nəbiyev 6 il müddətinə həbs olunub. Sumqayıt Apellyasiya Məhkəməsi onun şikayətini təmin etməyib.
İttihama görə, 1994-cü il təvəllüdlü Sadiq Nəbiyev evlənmək məqsədilə 30 oktyabr 2021-ci il tarixində Sumqayıt şəhər avtovağzalında sürdüyü mikroavtobusa əyləşmiş sərnişin Aminə Niyazovanı (şərti) yaşadığı Şamaxı rayonuna aparacağını bildirsə də, aldadaraq Quba rayonuna aparıb.
O, ailəsi ilə əlaqə saxlamaq istəyən qızın telefonunu sındırıb. Bundan sonra Aminə kişiyə müqavimət göstərib və açıq qapıdan çıxıb uzaqlaşmaq istəyib. Lakin Sadiq zərərçəkmişi tutub saxlayaraq mikroavtobusun qapısını bağlayıb. Bu zaman qızın sağ ayağı qapı arasında qalıb.
Bundan başqa, Sadiq Nəbiyev zərərçəkmiş şəxsin həyat və sağlamlığı üçün təhlükəli fiziki zor tətbiq etmək hədəsi ilə qızı Yerfi kəndinə gətirib. Həmin ərazidə 31 oktyabr saat 08:00 radələrinədək mikroavtobusun içərisində saxlamaqla qanunsuz azadlığını məhdudlaşdırıb, adam oğurluğu cinayəti törədib.
Qeyd edək ki, Aminə Niyazova Sumqayıt Dövlət Universitetinin tələbəsidir.
