Sumqayıtda 69 yaşlı kişi həyat yoldaşını döyüb. Bu haqda 31 iyul tarixində Sumqayıt24 Oxu.az-a istinadən məlumat verir.
Hadisə 8-ci mikrorayon ərazisində baş verib. Xalid (ad şərti) idarə etdiyi “Mercedes-Benz” markalı avtomobilin salonunda həyat yoldaşı Səkinənin (ad şərti) üzünə əli ilə vuraraq ona xəsarətlər yetirib.
Hadisəni törədən Xalidin barəsində Cinayət Məcəlləsinin “qəsdən sağlamlığa xəsarət yetirmə” maddəsi ilə ittiham elan edilib.
Təqsirləndirilən şəxs qismində ifadə verən Xalid ona elan olunmuş ittiham üzrə özünü təqsirli bilib.
O bildirib ki, zərərçəkmiş Səkinə onun həyət yoldaşıdır, onlar eyni ünvanda yaşayırlar:
“Hadisə günü saat 12:00 radələrində yaşadığım binanın həyətində arxa tərəfdə olan zaman Səkinə yanıma gəldi. Məndən keçən ay verdiyi pulla nə üçün su ödənişini etmədiyimi soruşdu, bu ay onun iştirakı ilə ödəniş etməli olduğumu dedi. Sonra Səkinə idarə etdiyim “Mercedes-Benz” markalı avtomobilinin qabaq sağ oturacağında əyləşdi. Məndən maşını sürməyimi, “su pulu”nu ödəməyə aparmağımı istədi. Mən də avtomobilin sükanı arxasına əyləşdim. Səkinəyə maşından yerə düşməsini bildirdim. Lakin Səkinə avtomobildən düşmədi. Bu səbəbdən aramızda mübahisə oldu. Mən də əsəbiləşərək Səkinənin avtomobildən yerə düşməsi üçün əlimin arxası ilə gözünə vurdum. Lakin Səkinə yenə də avtomobildən düşmədi. Bu səbəbdən Səkinəni avtomobildə qoyaraq özüm düşdüm və oradan kənarlaşdım”.
Sumqayıt Şəhər Məhkəməsi təqsirləndirilən şəxsin zərərçəkmişlə barışmasını, zərərçəkmiş şəxsin ondan şikayətçi olmamasını nəzərə alıb.
Bu səbəbdən Xalidin barəsində olan cinayət təqibinə xitam verilib.
O, cinayət məsuliyyətindən azad edilib.
