Hədə-qorxu ilə tələb etmədə təqsirləndirilən T.Məmmədovun kassasiya şikayətinə baxılıb.
Pravda.az-ın məlumatına görə, Ali Məhkəmədə hakim Teyyub Muxtarovun sədrliyi ilə keçirilən prosesdə qərar elan olunub. Qərara əsasən, kassasiya şikayəti təmin edilməyib.
İttihama görə, T.Məmmədov tamah niyyəti ilə tanışı, zərərçəkmiş G.G.-nin (ad, soyadı şərtidir) əmlakını hədə-qorxu ilə tələb edib. O, bu məqsədlə 2022-ci ildə yalandan özünü "Dedektiv.az" səhifəsinin özəl detektivi kimi təqdim edərək qadın barəsində rüsvayedici səs, videogörüntülər və fotoşəkillər əldə etdiyini bildirib. Sonra təqsirləndirilən şəxs həmin əldə etdiyi rüsvayedici səs, videogörüntülər və fotoşəkilləri zərərçəkmişin ailə üzvlərinə, qohumlarına göndərəcəyi və sosial şəbəkələrdə yerləşdirəcəyi barədə yazılmış mətni, imzasız məktubu Şəki şəhərində yaşayan və işləyən G.G.-yə göndərib. Daha sonra o, Abşeron rayonu, Xırdalan şəhəri ərazisində olarkən “İnstagram” sosial şəbəkəsində "Dedektiv.az" səhifəsindən və müxtəlif feyk profillərdən zərərçəkmiş şəxsin yaxınlarının “İnstagram”ına G.G.-nin barəsində rüsvayedici səs, videogörüntülər və fotoşəkilləri digər ailə üzvlərinə, qohumlarına və sosial şəbəkələrdə yerləşdirəcəyi ilə bağlı mesajlar yazıb. T.Məmmədov onların vasitəsi ilə G.G.-dən hədə-qorxu ilə 18000 manat məbləğində pul tələb edib.
Hadisədən sonra T.Məmmədov saxlanılaraq cinayət məsuliyyətinə cəlb edilib.
Sumqayıt Ağır Cinayətlər Məhkəməsinin hökmü ilə təqsirləndirilən şəxs 7 il müddətinə azadlıqdan məhrum edilib. Sumqayıt Apellyasiya Məhkəməsinin qərarı ilə onun apellyasiya şikayəti təmin edilməyib, hökm dəyişdirilmədən saxlanılıb. Sonra məhkum kassasiya şikayəti ilə Ali Məhkəməyə müraciət edib.
