Keçmiş arvadını döyən kişiyə hökm oxunub. Sumqayıt24 bu haqda 13 may tarixində Apa.az-a istinadən xəbər verir.
Təqsirləndirilən Eldar Nuriyev ilə Kəmalə Nuriyeva (ad soyad şərti) 11 il evlilikdən sonra 2014-cü ildə boşanıblar. Onların üç övladı olub. Eldar və Kəmalə boşandıqdan sonra da birgə yaşayıb, bu müddət ərzində aralarında mübahisələr də baş verib. Sonuncu mübahisə zamanı Eldar Nuriyev qadını vuraraq ona yüngül xəsarət yetirib.
Əmələ görə ona qarşı Cinayət Məcəlləsinin 128-ci (qəsdən sağlamlığa yüngül zərər vurma) maddəsi ilə ittiham irəli sürülüb.
Lakin Sumqayıt Şəhər Məhkəməsində zərərçəkmiş Kəmalə şikayətini geri götürdüyünü, keçmiş ərini bağışladığını bildirib. Təqsirləndirilən şəxs də əməlindən peşman olduğunu, hadisədən sonra başqa rayona köçdüyünü deyib.
Məhkəmənin qərarı ilə Eldar Nuriyevə 9 ay müddətinə azadlığın məhdudlaşdırılması (elektron qolbaq) cəzası verilib. Bundan əlavə, ona qadının evinə 50 metr məsafədə yaxınlaşmaq və onunla hər hansı formada, o cümlədən telefonla ünsiyyətə girmək qadağan olunub.
