"Nikoil” İKB ASC-nin (indiki “Yelo Bank”) Sumqayıt filialının vəzifəli şəxsləri Zaur Ramazanov və digərlərinin kassasiya şikayətinə baxılıb. Sumqayıt24 bu haqda 18 oktyabr tarixində Apa.az-a istinadən xəbər verir.
Proses Ali Məhkəmədə hakim Nazim Mövsümovun sədrliyi ilə keçirilib. Kassasiya şikayətinin mümkünlüyünü araşdırmaq üçün işin apellyasiya məhkəməsinə qaytarılması qərara alınıb.
İttihama görə, təqsirləndirilən şəxslərin bankın onlara etibar edilmiş 192 min manatını mənimsəmələrinə şübhələr üçün əsaslar var. Fakta görə cinayət işi başlayıb. Həmin vəzifəli şəxslərin vətəndaşların kreditlə aldıqları 451 min manat məbləğində əmlaklarını və nağd pullarını kreditin ödənişinə yönləndirəcəkləri adı ilə aldadaraq mənimsəmələrinə dair şübhələr müəyyən olunub.
Təqsirləndirilən şəxslərə qarşı Cinayət Məcəlləsinin 178.3.2 (külli miqdarda dələduzluq), 179.3.2 (külli miqdarda mənimsəmə və ya israf etmə), 308.2 (vəzifə səlahiyyətlərindən sui-istifadə), 311.3.2 (təkrar rüşvət alma) və 313-cü (vəzifə saxtakarlığı) maddələri ilə ittiham elan edilib.
Məhkəmənin hökmü ilə Ruslan Talıbov 10 il, Vüsal Quliyev və Elşən Xıdırov 9 il müddətinə həbs olunublar.
Bu iş üzrə cinayət məsuliyyətinə cəlb edilən və barələrində polis nəzarətinə verilmə qətimkan tədbiri seçilmiş şəxslər də həbs ediliblər. Ev dustaqlığında olan 61 yaşlı Nazim İsmayılov 9 il, 34 yaşlı Elçin Məmmədov 5 il, 44 yaşlı Zaur Ramazanov 5 il, 37 yaşlı Rauf Əliyev isə 6 il müddətinə azadlıqdan məhrum edilərək məhkəmə zalında həbs olunublar.
Ev dustaqlığında olan digər şəxslərə isə şərti cəza verilib.
