Sumqayıt şəhər Mənzil Kommunal Təsərrüfatı İstehsalat Birliyinin 20 saylı MKS-nin sabiq rəisi həbs edilib. Sumqayıt24 bu haqda 28 may tarixində Qafqazinfo.az-a istinadən xəbər verir.
Bir neçə ay əvvəl vəzifədən kənarlaşdırılan 48 yaşlı Anar Abbasov barəsində Cinayət Məcəlləsinin 29, 178.2.3, 29, 178.2.4, 178.3.2, 308.2 və 320.1-ci (Külli miqdarda dələduzluq, vəzifə səlahiyyətlərindən sui-istifadə, sənədlərin saxtalaşdırılması) maddələri ilə iş açılıb. Materiallar Sumqayıt Ağır Cinayətlər Məhkəməsinə göndərilib.
Məhkəmədə bildirilib ki, Abbasov bir neçə nəfəri aldadaraq külli miqdarda pul alıb. O, vətəndaşları inandırıb ki, 47-ci məhəllədə, 9 mərtəbəli köhnə yaşayış binalarında yerləşən keçmiş məcburi köçkünlərin məskunlaşdığı 2, 3, 4 otaqlı mənzillər boşaldıldıqdan sonra MKS-nin balansına keçəcək.
Anar boş mənzillərin satışını münasib qiymətə təşkil etdiyini, satışa nəzarətin MKTİB-nin rəhbərliyində olduğunu, şəxsiyyət vəsiqəsi ilə bir neçə ay ərzində sənədin-çıxarışın veriləcəyini, iki otaqlı mənzil 15, üç otaqlı mənzil 20, dörd otaqlı mənzil isə 25 min manata satılmaqla, satışdan əldə edilən pul vəsaitlərinin birliyin rəhbərliyinə çatacağını vəd edib. Bununla da o, həmin şəxslərdən 18,3, 42 və 186 min manat alıb.
A. Abbasov saxta möhür hazırlatdıraraq sənədləri saxtalaşdırıb. O, zərərçəkmiş şəxslərdən pulu Məhəmməd Əsədov küçəsində yerləşən xidməti otağında alıb.
Lakin bir müddət sonra yalanın üstü açılıb və 2021-2023-cü illərdə 20 saylı MKS-də rəis vəzifəsində çalışan şəxs işdən çıxarılıb.
Sumqayıt Ağır Cinayətlər Məhkəməsinin hökmü ilə ona 8 il həbs cəzası verilib.
