Sumqayıt sakini pivə almaq üçün qonşusunu qarət edib. Sumqayıt24 bu barədə 20 sentyabr tarixində Qafqazinfo.az-a istinadən xəbər verir.
Məlumata əsasən, 30 yaşlı Mehman Əliyev (şərti soyad) yaşadığı binanın həyətində iki şüşə pivə içib. Pulu qutardıqda isə 25 il eyni məhəllədə yaşadığı Azər Rzayevi həyətə çağırıb. Azərə təklif edib ki, pivəni o alsın və birlikdə içsinlər. Qonşu imtina etdikdə Mehman onun şalvarının cibindən pulqabını dartaraq qaçıb. İçindəki 42 manata isə 3 butulka pivə, 1 qutu siqaret, alışqan və çips alaraq içməyə davam edib.
Daha sonra Azər istəməsə də, həyat yoldaşı ondan xəbərsiz DİN-nin 102 xidmətinə məlumat verib. Nəticədə polis əməkdaşları Mehmanı tutaraq bölməyə aparıblar. Burada o, törətdiyi əməli etiraf edib.
Faktla bağlı cinayət işi başlanıb və Mehman Sumqayıt Şəhər Məhkəməsində mühakimə olunub. Məhkəmədə tərəflər barışdıqlarını bildiriblər.
Lakin hakim Mehman Əliyevin “soyğunçuluq” maddəsi ilə təqsirli bilinməsinə qərar verib və o, 6 ay müddətində həbs edilib.
