Xuliqanlıqda təqsirləndirilən İ.Səlimovun kassasiya şikayətinə baxılıb.
Pravda.az-ın məlumatına görə, Ali Məhkəmədə hakim Nazim Mövsümovun sədrliyi ilə keçirilən prosesdə qərar elan edilib.
Qərara əsasən, kassasiya şikayəti təmin edilib, Sumqayıt Apellyasiya Məhkəməsinin çıxardığı qərar dəyişdirilib. Məhkumun əməli Cinayət Məcəlləsinin (CM) 221.3-cü (xuliqanlıq) maddəsindən həmin Məcəllənin 128-ci (qəsdən sağlamlığa yüngül zərər vurma) maddəsinə tövsif edilib.
İ.Səlimovun Sumqayıt Şəhər Məhkəməsinin 09 iyun 2023-cü il tarixli hökmü ləğv edilib, CM-in 128-ci maddəsi ilə cinayət məsuliyyətindən azad edilib və onun barəsində olan cinayət işi üzrə icraatına xitam verilib.
İttihama görə, hadisə 12 iyul 2022-ci ildə Sumqayıt şəhəri, 9-cu mikrorayon ərazisində yerləşən parkda qeydə alınıb.
Belə ki, İ.Səlimov zərərçəkmiş İ.Məmmədovla mübahisə edib. Buna səbəb zərərçəkmişin ona qızı yaşında qızlara sataşmasını irad bildirməsi olub.
Təqsirləndirilən şəxs də bunu bəhanə edib heç bir əsaslı səbəb olmadan vətəndaşların gözü qarşısında bıçaqla zərərçəkmişin boğaz nahiyəsinə 1 dəfə zərbə endirib.
Sumqayıt Şəhər Məhkəməsinin hökmü ilə ona şərti cəza verilib. Hökmdən narazı qalan dövlət ittihamçısı apellyasiya protesti verib. Sumqayıt Apellyasiya Məhkəməsi protesti təmin etməyib.
