“Toydan qayıdanda telefonunda “İnstagram” tətbiqini gördüm. Başqa kişilərlə danışırdı”.
Sumqayit24.az-ın əldə etdiyi məlumata görə, bu sözləri məhkəmə qarşısında arvadını xəyanət üstündə bıçaqlamaqda təqsirləndirilən Adil Qafarov (ad şərtidir) deyib.
Belə ki, oktyabrın 6-da 1985-ci il təvəllüdlü Adil Qafarov Sumqayıtda, 7 nömrəli fərdi yaşayış evində qeyri-rəsmi ər-arvad münasibətində yaşadığı Çinarə Əliyevanın (ad şərtidir) “İnstaqram” sosial şəbəkəsində ayrı-ayrı şəxslərlə yazışaraq ona xəyanət etməsindən şübhələnib. Buna görə qısqanclıq zəmnində yaratdığı mübahisə zamanı Çinarənin bel və qarın nahiyəsindən 3 dəfə bıçaqlayıb.
Təqsirləndirilən şəxsə qarşı Cinayət Məcəlləsinin 126.1-ci (qəsdən sağlamlığa zərbə vurma) maddəsi ilə cinayət işi açılıb. Məhkəmə istintaqına Sumqayıt Ağır Cinayətlər Məhkəməsində hakim Fəhmin Hümbətovun sədrliyi ilə baxılıb.
Məhkəmə istintaqı zamanı təqsirləndirilən Adil Qafarova ifadə vermək üçün şərait yaradılıb. O, törətdiyi əməldə özünü qismən təqsirli bilərək ifadəsində deyib:
“Çinarə ilə 2021-ci ildə taksi fəaliyyəti ilə məşğul olanda tanış oldum. Tanışlığımız sonra sevgi münasibətinə çevrildi. Valideynlərin razılığı ilə qeyri-rəsmi olsa da, birgə yaşamağa başladıq.
Çinarə Qusara iş yoldaşının toyuna getmişdi. Qusardan qayıdandan sonra Çinarənin telefonunda “İnstagram” sosial şəbəkəsindəki hesabını gördüm. Amma Çinarə ilə əvvəldən razılaşmışdıq ki, ikimiz də “İnstagram” işlətməyək.
Çinarədən bunun səbəbini soruşdum. O, mənə xəbəri olmadığını dedi. Lakin onun yazışmaları var idi. Oxuya bilməyim deyə şifrəsini dəyişmişdi. Daha sonra barışdıq. Amma Çinarəni bir gün işə getməyə qoymadım. Birisi gün Çinarəni işə aparıb, mesajları oxumaq üçün telefonunu proqramistə apardım. Lakin mesajların çoxu silinmişdi. “Maqa” adlı biri ona yazmışdı, Çinarə də evli olduğunu demişdi. Çinarənin adından ona yazıb, nömrəsini aldım. Mətbəxdən bıçağı götürüb, “Maqa” ilə görüşməyə gedirdim. Çinarə qarşımı kəsdi onu bıçaqladım. Əməlimdən peşmanam, Çinarə ilə barışmışam”.
Məhkəmədə dindirilmiş zərərçəkmiş Çinarə Əliyeva ifadəsində göstərib:
“Adillə 2021-ci ilin mart ayında tanış olduq. Birgə yaşayırdıq, dini nikahımız da var. “İnstagram” sosial şəbəkəsində “Maqa” adlı şəxslə tanış olub yazışdığım üçün Adillə aramızda mübahisə düşdü. Çünki Adil mənim telefonumda yazışma görmüşdü. Adil Maqa adlı şəxsə zəng edərək onunla görüşmək istədiyini bildirdi. Mən isə qarşısını kəsmək istəyən zaman darvazanın girişində bıçaqla vuruldum. Adillə barışmışam”.
Məhkəmə-psixoloji ekspertizasının rəyinə əsasən, təqsirləndirilən şəxsdə hər hansı psixi xəstəliyin əlamətləri aşkar olunmayıb.
Məhkəmədə şahidlər və zərərçəkmiş tərəflər ifadə verib. Verilən ifadələr və aparılan araşdırmalarla Adil Qafarov cinayətdə təqsirli bilinib.
Sonda məhkəmənin yekun qərarı ilə Adil Qafarov 3 il müddətində azadlıqdan məhrum edilib. O, azadlıqdan məhrumetmə cəzasını ümumi rejimli cəzaçəkmə müəssisəsində çəkəcək.
Fidan İlqar
