Sumqayıtda həyat yoldaşını öldürən, qayınanasını isə yaralayan şəxsin kimliyi məlum olub. Sumqayıt24 bu haqda bu gün, 10 may tarixində Qafqazinfo.az-a istinadən xəbər verir.
Qurd dərəsi yaşayış massivində 41 yaşlı həyat yoldaşı İlahə İsgəndərovanı 13 bıçaq zərbəsi ilə öldürən, qayınanası İ. Nağıyevaya isə xəsarətlər yetirən şəxsin Tofiq Həsənov olduğu müəyyən olub. Məlumata görə, o, biznesmendir, Rusiyada fəaliyyət göstərib və ticarətlə məşğul olub.
Qeyd olunub ki, hadisə, ailədə pula görə yaranmış münaqişəyə görə baş verib. Həsənovun sözlərinə görə onun, mənzildə saxladığı 180 min manat pulu yoldaşı və qayınanası tərəfindən ələ keçirilib. O, bu səbəbdən hətta hüquq-mühafizə orqanlarına da müraciət edib.
Bundan sonra İlahə İsgəndərova anası ilə birgə Qurd dərəsində ev alıb və onlar ayrı yaşamağa başlayıblar.
Bildirilir ki, əvvəllər də məhkum olunmuş Həsənovun 8 may tarixində həyat yoldaşı və qayınanasının yaşadığı evdə olarkən, onların arasında pul məsələsinə görə növbəti dəfə münaqişə yaranıb. Bu zaman o, bəhs etdiyimiz əməli törədib.
T. Həsənov saxlanılıb. Faktla bağlı araşdırma aparılır.
