Sumqayıt polisi tərəfindən dələduz saxlanılıb. Sumqayıt24 bu haqda 5 sentyabr tarixində Daxili İşlər Nazirliyinə (DİN) istinadən xəbər verir.
TikTok sosial şəbəkəsində vətəndaşların pul vəsaitlərinin “falçılıq”, “baxıcılıq”, “taleyin dəyişdirilməsi” və digər adlar vasitəsilə ələ keçirilməsi barədə polisə çoxsaylı müraciətlər daxil olub.
Bu tip talama əməllərində şübhəli bilinən şəxs, 38 yaşlı Fuad Məmmədov tutulub. Onun sosial şəbəkələrdə özünü “falçı” və “baxıcı” kimi təqdim edərək vətəndaşların pul vəsaitlərini onlayn köçürmə yolu ilə mənimsədiyi müəyyən edilib. F. Məmmədov məsuliyyətdən yayınmaq üçün aldatdığı şəxslərin hesablarını sonradan bloklayıb.
Faktlarla bağlı Sumqayıt ŞPİ-nin İstintaq Şöbəsində cinayət işi başlanılıb, araşdırmalar davam etdirilir.
F. Məmmədovun əməllərindən zərər çəkən başqa şəxslər varsa, polisə müraciət edə bilərlər.
