Arvadını öldürmək istəyən Rasim Quliyevin (soyadı şərti) məhkəmə iclası yekunlaşıb. Sumqayıt24 bu haqda 2 iyun tarixində Pravda.az-a istinadən xəbər verir.
Sumqayıt Ağır Cinayətlər Məhkəməsində hakim Hafiz Əliyevin sədrliyi ilə keçirilən prosesdə hökm oxunub. Qərara əsasən, o, 10 il 6 ay müddətinə azadlıqdan məhrum edilib.
İttihama görə, hadisə Sumqayıtda qeydə alınıb. Belə ki, 49 yaşlı Rasim Quliyev 2019-cu ildə boşandığı arvadı Nərgiz Həsənovaya (şərti) ailə münasibətlərini bərpa etməyi təklif edib. Lakin qadın təklifi rədd edib. Hadisə günü Rasim saat 8:00 radələrində Nərgizin yaşadığı ünvana gəlib. O, blokun üçüncü mərtəbəsi ilə dördüncü mərtəbəsi arasındakı meydançada qadını gözləyib. Nərgiz işə getmək üçün 08:15-də evdən çıxıb və bu zaman Rasim ona yaxınlaşıb. O, yenidən evlənməyi təklif etsə də, eyni cavabı alıb. Daha sonra Rasim qısqanclıq zəminində qadını öldürmək niyyəti ilə hər iki əli ilə onun boğazından tutaraq sıxıb. Bu zaman səsə qonşu çıxıb və onu kişinin əlindən alaraq, xəstəxanaya çatdırıb.
Nərgizin həyatını xilas etmək mümkün olub.
