Sumqayıtda arvadını döyən şəxsə hökm oxunub. Sumqayıt24 bu haqda 6 yanvar tarixində Pravda.az-a istinadən xəbər verir.
Hadisə 15-ci məhəllədə yerləşən yataqxanadakı mənzillərin birində qeydə alınıb. Üç uşaq atası Murad Bayramov həyat yoldaşı Zəminə Bayramovanın (şərti) başına və sağ qulağına vurub, sonra isə saçını yolub.
Məlumata görə, Zəminə Bayramova sexdə çalışıb. Murad onu orada çalışan digər kişiyə qısqanıb. O, Zəminədən işdən çıxmasını tələb edib, qadın isə həmin şəxsin daha sexdə çalışmadığını bildirib. Lakin Murad bunun yalan olduğunu öyrənib. Nəticədə məlum olay baş verib.
Murad Bayramov özünü təqsirli bilib və ifadəsində söyləyib ki, hadisə günü evə sərxoş gəlib. O, həyat yoldaşından nəyə görə onu aldatmasını soruşduqda Zəminə kobud danışaraq, ərinin üstünə acıqlanıb. Buna görə də o, əsəbiləşib, arvadının saçından tutub və əli ilə onun sağ qulaq və boynunun arxasına iki dəfə zərbə endirib. Zəminə isə onun əlindən çıxaraq, dəhlizə qaçıb və bu barədə polisə məlumat verib.
Sumqayıt Şəhər Məhkəməsində hakim Zaur Hacıyevin sədrliyi ilə keçirilən prosesdə Murad 240 saat müddətinə ictimai işlər cəzasına məhkum edilib.
