Sumqayıtda evdən oğurluq edilib. Sumqayıt24 bu haqda 17 fevral tarixində Xeberle.com-a istinadən xəbər verir.
Hadisə 14 fevral saat 15:15-də Yaşıldərə yaşayış massivi, 2-ci məhəllə, Ziba Əliyeva, 28 ünvanında qeydə alınıb. Ev sahibi, 9 nömrəli məktəbin müəllimi, Azərbaycan Jurnalistlər Birliyinin üzvü, media mənsubu Vüqar Abdullayev bildirib ki, ondan 15 min manat dəyərində qızıl-zinət əşyaları, 7000 manat civarında pul oğurlanıb:
"28 ildən sonra bu mənzili kreditlə almışam. Övladım Vətən müharibəsi iştirakçısıdır. Evimizdə oğurluq düşünülmüş şəkildə – planlı olub. Oğurluqdan əvvəl qayınanam rəhmətə getmişdi. Mənzildən 15 min manatlıq qızıl-zinət əşyaları aparılıb. 4100 manat mərasim-hüzür dəftərinin içindən və 2500 manat oğlumun dolabından götürülüb. Oğurluq olmamışdan öncə hər gün məni güdüblər. 3-cü gündən öncə evimizin yaxınlığında arıq, hündür oğlan gördüm. Uzaqdan gələndə onu sezdim. Mən yaxınlaşanda ərazidən uzaqlaşdı. Darvazaya çatanda gözucu məni aşağıdan yuxarı süzdü. Növbəti gün isə oğurluq hadisəsi baş verdi. Qonşunun həyətindən nərdivan qoyulub və həyətimizə keçid ediblər. Maraqlıdır ki, oğurluq baş verən zaman iki qonşunun heç biri görməyib. Bıçaqla açıb giriblər. Oğurluq planlı şəkildə həyata keçirilib. Bir nəfər də evimizin yanında yerləşən marketin yanında gözləyib ki, kimsə gəlsə, xəbər versin. Mən qapıdan evə girən kimi tez onlara xəbər verilib. Necə tələsiblərsə, bıçağı da taxtın üzərində unudublar. İçəri girəndə şoka düşdüm. Hər yer dağınıq vəziyyətdə idi. Tez polisə zəng edib məlumat verdim. Sağ olsunlar, operativ şəkildə reaksiya verdilər. Hazırda istintaq aparılır”.
[video width="1280" height="720" mp4="https://sumqayit24.az/storage/photos/2024/02/Sumqayitda-jurnalist-Vuqar-Abdullayevin-mazilindan-ogurluq-oldu.mp4"][/video]
