Sumqayıtda dələduzluqda təqsirləndirilən 34 yaşlı İlkin Əsgərovun məhkəmə prosesi yekunlaşıb. Bu haqda 26 fevral tarixində Sumqayıt24 Qafqazinfo.az-a istinadən məlumat verir.
İşə Sumqayıt Şəhər Məhkəməsində baxılıb. Hökmə əsasən, İ.Əsgərov Cinayət Məcəlləsinin “dələduzluq xeyli miqdarda ziyan vurmaqla törədildikdə” maddəsi ilə təqsirləndirilib.
Məhkəmədə bildirilib ki, İlkin hadisədən bir müddət əvvəl keçmiş qonşusu G.Muxtarova və onun anası K.Muxtarova ilə qarşılaşıb və bir-birinə nömrə veriblər. Bundan sonra İ.Əsgərov K.Muxtarovanın işlədiyi uşaq bağçasında müdir vəzifəsindən kənarlaşdırıldığını öyrənib.
O, qadını həmin vəzifəyə bərpa etdirəcəyini vəd edib və bunun müqabilində bir neçə dəfəyə ümumilikdə 15 min manat pulunu alıb. Lakin İ.Əsgərov verdiyi vədlə bağlı heç bir addım atmayıb, aldığı pulları ələ keçirib.
Bundan sonra K.Muxtarova polisə müraciət edib və İlkin Əsgərov barəsində cinayət işi açılıb. Araşdırmalar zamanı İlkinin əvvəllər başqa şəxsə qarşı da dələduzluq etdiyi müəyyənləşib.
Sumqayıt Şəhər Məhkəməsi təqsirləndirilən şəxsi qeyd edilən maddə üzrə təqsirli bilib. İstintaq müddətində polisin nəzarəti altında olan şəxsə 3 il 6 ay həbs cəzası verilib.
