Əmisi, əmisinin arvadı və əmisi qızını balta ilə öldürən, bir nəfəri isə yaralayan Sərxan Həşimovun məhkəməsinin hazırlıq iclası keçirilib. Sumqayıt24 bu haqda 22 fevral tarixində Report.az-a istinadən xəbər verir.
Sumqayıt Ağır Cinayətlər Məhkəməsində hakim Nahid Mirzəyevin sədrliyi ilə baş tutan prosesdə onun anket məlumatları dəqiqləşdirilib. Həşimova hüquq və vəzifələri izah olunub.
Baxış iclası martın 7-nə təyin edilib.
Hadisə ötən il iyulun 3-də Abşeron rayonu, Digah qəsəbəsi, Q.Qarayev küçəsi ərazisində baş verib. 1974-cü il təvəllüdlü S. Həşimovun qisas niyyəti ilə əmisi Hicran Həşimov, əmisinin arvadı Zümrüd Həşimova və əmisi qızı Xəyalə Kərimovanı balta ilə çoxsaylı xəsarətlər yetirərək xüsusi amansızlıqda qəsdən öldürməsi, daha sonra Mehdiabad qəsəbəsi ərazisində Ələsgər Hüseynova həmin balta ilə çoxsaylı xəsarətlər yetirməklə xuliqanlıq niyyəti ilə qəsdən öldürmək istəməsinə əsaslı şübhələr müəyyən edilib.
Toplanmış sübutlar əsasında S. Həşimova Cinayət Məcəlləsinin 120.2.4, 120.2.7, 29,120.2.2, 29,120.2.4 və 29,120.2.10-cu (xüsusi amansızlıqla iki və ya daha çox şəxsi öldürmə və xuliqanlıq niyyəti ilə, xüsusi amansızlıqla təkrarən qəsdən adam öldürməyə cəhd) maddələri ilə yekun ittiham elan edilib. Barəsində məhkəmənin qərarı ilə həbs qətimkan tədbiri seçilib.
Qeyd edək ki, təqsirləndirilən şəxs bundan öncə 3 dəfə məhkumluq həyatı yaşayıb. 2 məhkumluğu ödənilib. 3-cü məhkumluğu isə CM-in 177.2.4-cü maddəsi ilə olub. Saxlanılan zaman üzərində məhkumluğu olub.
