Sumqayıtda sərxoş kişini bıçaqlayan şəxsə cəza verildi.
Oxu.az-ın məlumatına görə, Sumqayıt Ağır Cinayətlər Məhkəməsində keçirilən prosesdə qəsdən sağlamlığa ağır zərər vurmaqda təqsirləndirilən Nicat Bayramova 3 il azadlıqdan məhrum edilmə hökmü oxunub.
Məhkəmə tərəflərin barışdığını nəzərə alaraq, N.Bayramova Cinayət Məcəlləsinin 70-ci maddəsini tətbiq edib və onun cəzasını şərti hesab edib. O, məhkəmə zalından azadlığa buraxılıb.
İttihama görə, N.Bayramov axşam saatlarında dostu ilə birlikdə küçədə itini gəzdirməyə çıxıb. Həmin vaxt onlar Sumqayıt şəhəri, Sülh prospekti ilə hərəkət edərkən, həmin küçədəki "Dədə Qorqud" şadlıq sarayında keçirilən toy mərasimindən sərxoş vəziyyətdə çıxan Santar Hüseynov ətrafdakı insanları söyərək təhqir edib. Sərxoş şəxs, həmçinin N.Bayramovu da söyüb və təhqir edib. N.Bayramov ona söyüşlə cavab verib. S.Hüseynov əlini şalvarının belinə ataraq N.Bayramova "səni bıçaqlayaram" deyərək onun üzərinə gəlib. N.Bayramov isə üzərində gəzdirdiyi bıçaqla S.Hüseynova iki zərbə endirib.
Yaralı xəstəxanaya yerləşdirilib.
