Sumqayıtda qəsdən sağlamlığa yüngül zərər vurmada təqsirləndirilən Əkrəm Məmmədlinin (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın məlumatına görə, Sumqayıt Şəhər Məhkəməsində hakim Rəşad Mustafayevin sədrliyi ilə keçirilən prosesdə hökm oxunub. Hökmə əsasən, o, cinayət məsuliyyətindən azad edilib və barəsində olan cinayət işinin icraatına xitam verilib.
İttihama görə, hadisə bu il Sülh prospektində yerləşən “Dədə Qorqud” restoranının qarşısında qeydə alınıb.
Belə ki, Əkrəm Məmmədli ilə əvvəldən tanıdığı zərərçəkmiş Rasim Hacıyevlə (adı, soyadı şərtidir) aralarında şəxsi münasibətlər zəminində mübahisə yaranıb. Mübahisə zamanı təqsirləndirilən şəxs əsəbiləşərək yumruqla tanışının sol göz nahiyəsinə bir dəfə zərbə endirib.
Ə.Məmmədli istintaq və məhkəmə iclasında özünü təqsirli bilib, əməlindən səmimi peşman olduğunu deyib, zərərçəkmiş şəxslə barışdığını qeyd edib.
Qeyd üsək ki, Rasim Hacıyev taksi fəaliyyəti ilə məşğul olur.
