Sumqayıtda yaşlı qadın və azyaşlını avtomobil ilə vuran şəxsə hökm oxunub. Sumqayıt24 bu haqda bu gün, 30 aprel tarixində Kriminalqafqaz.az-a istinadən xəbər verir.
Hadisə ötən il baş verib. Belə ki, taksi fəaliyyəti ilə məşğul olan 40 yaşlı Süleyman Hüseynov idarə etdiyi “Mercedes” markalı avtomobil ilə yolu keçən 61 yaşlı qadını və onun 6 yaşlı qardaşı qızını vurub. Nəticədə qadın aldığı xəsarətlərdən vəfat edib.
Məhkəmədə ifadə verən Süleyman Hüseynov etdiyi əməldən peşman olduğunu bildirib. Onun sözlərinə görə, qadın və uşaq yolu asta addımlarla keçirdilər. Bu səbəbdən, o, əyləcə basaraq sürəti azaltmaq istəsə də, onlara dəyib: “Sürət həddi 50-55 km/saat idi. Hadisə baş verən kimi aşağı düşüb onlara kömək etməyə çalışdım. Qadını maşına qoyub xəstəxanaya çatdırsam da, o öldü. Hadisəyə görə çox peşmanam”.
Sumqayıt Şəhər Məhkəməsinin hökmü ilə Süleyman Hüseynov 5 il 2 ay 28 gün müddətinə azadlıqdan məhrum edilib.
