Ötən gecə Sumqayıtda yaşayış binasında yanğın baş verib.
Sumqayit24.az şikayətlə müraciət edən sakinlər bildiriblər ki, 26-cı məhəllə, bina 72/42-dəki hadisəyə səbəb elektrik sayğacları qəzalı vəziyyətdə olması və bundan irəli gələn qısaqapanmadır.
“Elektrik sayğaclarında dəfələrlə yanğın qeydə alınıb. Lakin alovun həcmi nisbətən zəif olduğu üçün sakinlər yanğının qarşısını özləri alıblar. Ötən gecə isə yaranan qısaqapanma böyük yanğına səbəb olub. Yanğınsöndürənlər alovun qarşısını alsa da, təhlükəli vəziyyət hələ də davam edir”, - şikayətdə deyilir.
Bina sakinləri mövcud durumdan olduqca narahatdırlar və müvafiq qurumlardan əməli tədbirlərin görülməsini gözləyirlər.
