Sumqayıtda yaşlı qadını qətlə yetirən şəxsin məhkəmə prosesi keçirilib. Sumqayıt24 bu barədə 10 oktyabr tarixində Qafqazinfo.az-a istinadən xəbər verir.
Sumqayıt Ağır Cinayətlər Məhkəməsində hadisəni törədən Xızı sakini, 27 yaşlı Xanəhməd Rüstəmov “xüsusi amansızlıqla və quldurluq niyyəti ilə adam öldürmə” və “Quldurluq-sağlamlığa ağır zərər vurmaqla” maddələri ilə təqsirləndirilib. Məhkəmədə məlum olub ki, X.Rüstəmov "Azərbaycan Dəmir Yolları" QSC-nin Mühafizə Departamentinin yüklərin və obyektlərin mühafizə komandasının əməkdaşı olub.
Hadisə ötən ilin noyabr ayında qeydə alınıb. X.Rüstəmov iş yerini özbaşına tərk edərək oğurluq məqsədilə əvvəlcədən seçdiyi mənzilə yaxınlaşıb. O, gecə saat 04 radələrində 3-cü mərtəbədəki mənzilə eyvandan daxil olaraq axtarışa başlayıb və bu zaman burada yaşayışın olduğunu, qonşu otaqdan səs gəldiyini görüb. Daha sonra Xanəhməd eyvandan götürdüyü daşla 77 yaşlı tək yaşayan Züleyxa Osmanovaya ağır zərbələr endirib, onun ölmədiyini gördükdə isə yerə yıxaraq boğub. Evdən 40 manat pul, telefon, noutbuk götürən şəxs daha sonra oradan uzaqlaşıb.
Məhkəmədə bildirilib ki, Z.Osmanovanın övladları İngiltərə və Hollandiya vətəndaşlarıdır və ana vaxtaşırı olaraq bu ölkələrə səfər edib. Azərbaycanda olanda isə Sumqayıtdakı evində tək yaşayıb.
Həyata keçirilən əməliyyat-axtarış tədbirləri nəticəsində qətli törədən şəxs tutulub. O, törətdiyi əməli etiraf edib.
Məhkəmə prosesində ifadə verən QSC-nin Mühafizə departamentinin yüklərin və obyektlərin mühafizə komandasının rəisi X.Rüstəmovun hadisə baş verən gün sutkalıq xidmətdə olduğunu və iş yerini özbaşına tərk etdiyini bildirib.
X.Rüstəmov isə evə basqın etməzdən əvvəl xidməti geyimini çıxararaq mülki paltar geyindiyini deyib.
Məhkəmənin hökmü ilə X.Rüstəmova 19 il müddətinə həbs cəzası verilib.
