Sumqayıtda tanışını bıçaqlamaqda təqsirləndirilən Ayaz Bəylərovun barəsindəki hökmdən verilən apellyasiya şikayəti üzrə məhkəmə iclası yekunlaşıb. Bu haqda 4 iyul tarixində Sumqayıt24 Pravda.az-a istinadən məlumat verir.
Sumqayıt Apellyasiya Məhkəməsində hakim Elman Rəhimovun sədrliyi ilə keçirilən prosesdə qərar elan olunub. Qərara əsasən, apellyasiya şikayəti təmin edilməyib.
Qeyd edək ki, hadisə 29 avqust 2023-cü ildə 51-ci məhəllə ərazisində yerləşən təqsirləndirilən şəxsin icarə əsasında işlətdiyi ət satışı mağazasında qeydə alınıb.
A. Bəylərov tanışı, zərərçəkmiş, 65 yaşlı Əsəd Əsədovla aralarında olan borcla əlaqədar mübahisə edib. Bu zaman o, ət doğrayan kötüyün üzərində olan bıçağı götürərək zərərçəkmiş şəxsin qarın nahiyəsindən bir dəfə qəsdən vuraraq, ona bədən xəsarəti yetirib.
Sumqayıt Ağır Cinayətlər Məhkəməsinin hökmü ilə o, 4 il müddətinə azadlıqdan məhrum edilib.
