Qubada narkotik təsiri altında tanışını öldürmək istəyən Sumqayıt sakini saxlanılıb. Sumqayıt24 bu haqda bu gün, 14 mart tarixində Report-a istinadən xəbər verir.
Belə ki, Daxili İşlər Nazirliyinin “102-Zəng Mərkəzi”nə müraciət edən Sumqayıt şəhər sakini S. Seyidova 12 mart tarixində, ögey bacısı R. Cəfərovanın Əmrah adlı şəxslə birlikdə Quba şəhərində olmalarını, sonuncunun özünü və qızı öldürmək istəməsini bildirib.
Polis əməkdaşları dərhal, Sumqayıt sakinləri Ə.Ağazadə və R.Cəfərovanın olduqları yeri müəyyən edib, onları Polis Şöbəsinə gətiriblər.
Nəticədə, saxlanılan şəxslərin narkotik vasitənin təsiri altında olmaları müəyyən olunub. Onlar barəsində İnzibati Xətalar Məcəlləsinin 206-cı maddəsi ilə protokol tərtib edilib.
Məhkəmənin qərarı ilə Ağazadə 20 gün müddətində inzibati qaydada həbs olunub, Cəfərova isə 400 manat məbləğində cərimələnib.
