Sumqayıtda uşağı öldürən məşqçinin narkoman olduğu üzə çıxıb. Sumqayıt24 bu haqda 10 may tarixində BakuTV-yə istinadən xəbər verir.
Məşq zamanı təhlükəli fənd işlədərək 7 yaşlı Fərid Bakarovu öldürən Mehman Xəlilov mütəmadi narkotik və psixotrop maddələrdən istifadə edib. Mehmanın qohumu olan şahid bildirib ki, məşqçi fiziki güclü, xarakter cəhətdən isə zəifdir. O, son vaxtlar spirtli içki və hətta narkotik vasitələrdən də istifadə edirdi.
Məlumata görə, Mehman Xəlilov hadisə baş verən gün, 29 aprel 2023-cü ildə də narkotik maddə axtarıb. Məhkəmə təqsirləndirilən şəxsə verilmiş ittihamı təhlil edərək qeyd edib ki, onun törətdiyi əməllər ibtidai istintaq orqanı tərəfindən düzgün tövsif olunub, həmin əməllər qəsdən törədilib.
Mehman Xəlilov məhz xüsusi amansızlıqla, aşkar surətdə köməksiz vəziyyətdə olan 7 yaşlı Fəridi qəsdən öldürüb. Məhkəmənin qənaətinə görə, Fəridin anası Aynurun Mehmanla sevgi münasibətlərinə son qoyması idmançıda qisas hissi yaradıb.
Hadisə günü Mehman Fəridə qarşı üst-üstə, hətta qulaqlarından da tutmaqla 80 dəfə təhlükəli fənd işlədərək onu yerə çırpıb. Uşaqla birlikdə məşqə gedən qardaşı ifadəsində bildirib ki, Mehman müəllim hər zaman onlarla yaxşı rəftar edib. Lakin həmin gün Mehman onlarla, özəlliklə də qardaşı Fəridlə pis rəftar etməyə başlayıb. Belə ki, Fərid ağlayaraq anasına məşqə getmək istəmədiyini bildirib. Anası da məşqçiyə zəng vuraraq Fəridin məşqə gəlmək istəmədiyini deyib.
Lakin Mehmanla danışdıqdan sonra anası onları məşqə aparıb. Uşaqlar gələn kimi Mehman Fəridi qaldıraraq başının üzərindən yerə çırpıb, ardınca daha bir neçə dəfə həmin hərəkəti təkrarlayıb. Sonra əsəbi halda azyaşlıdan nə üçün məşqə gəlmək istəmədiyini soruşub.
Qardaşı bildirib ki, ilk vaxtlar Fərid yerə çırpıldıqdan sonra ayağa qalxsa da, bir qədər sonra dura bilməyib. Uşaq ifadəsi zamanı qeyd edib ki, idmançı Fəridə “yenə də anana “gəlmirəm” deyəcəksən?” sualını təkrar-təkrar verərək ona qarşı təhlükəli fəndlər edib.
Tibbi müayinə protokolundan da görünür ki, Mehmandan götürülmüş analizlərdə onda marixuana və opioidlərin qəbulu aşkarlanıb.
Məhkəmə Mehman Xəlilovu 19 il müddətinə azadlıqdan məhrum edib.
