Bu gün görkəmli Azərbaycan rejissoru Rasim Ocaqovun doğum günüdür.
Rasim Ocaqov 1933-cü ildə Şəki şəhərində anadan olub. Moskvada Kinooperatorluq, daha sonra Azərbaycan Dövlət İncəsənət İnstitutunda rejissorluq təhsili alıb. 1956-cı ildən "Azərbaycanfilm" kinostudiyasında quruluşçu-operator, 1973-cü ildən quruluşçu-rejissor işləyib.
1958-ci ildə çəkdiyi "Onun böyük ürəyi" filmi Ocaqovun ilk sərbəst işi olub və Sumqayıt metallurqlarının həyatını ekranlaşdırıb. Bu ağır peşə adamlarının ekran həyatı operatorun kamerası ilə romantik və cəzbedici bir formaya salınıb.
Bundan sonra lentə aldığı "Əsl dost", "Bizim küçə", "Mən rəqs edəcəyəm", "Sən niyə susursan?" və "Skripkanın sərgüzəşti" filmlərində Rasim Ocaqov Azərbaycan kinosunda operatorluq sənətinin ən layiqli nümunələrini yaradıb.
Rejissor kimi ilk işi 1975-ci ildə yarımçıq qalmış "Gəncəbasarlı qisasçı" filminin tamamlanması olub. Sonrakı filmləri — "Tütək səsi", "Ad günü", "Bağlı qapı", "Özgə ömür" və digər əsərləri ilə Azərbaycan kinosunda mühüm iz buraxıb.
R.Ocaqov 1980–81-ci illərdə Dövlət mükafatlarına, 1982-ci ildə "Azərbaycanın Xalq artisti" adına layiq görülüb, 2002-ci ildə Prezidentin fərdi təqaüdünə layiq görülüb. O, 2006-cı ildə Bakıda vəfat edib.
