Sumqayıtda yerləşən alman əsirlərinin məzarlığı ziyarət edilib.
Sumqayit24.az xəbər verir ki, Sumqayıt şəhər İcra Hakimiyyətinin başçısı Zakir Fərəcov, Almaniya Federativ Respublikasının ölkəmizdəki fövqəladə və səlahiyyətli səfiri Ralf Horleman, Macarıstanın ölkəmizdəki fövqəladə və səlahiyyətli səfiri Tamaş Torma və Avstriya Respublikasının ölkəmizdəki fövqəladə və səlahiyyətli səfiri Tomas Şuller-Qötzburq Sumqayıtda yerləşən alman əsirlərinin məzarlığını ziyarət ediblər.
Əvvəlcə hərbi əsirlərin xatirəsinə ucaldılmış abidənin önünə əklil və tər gül dəstələri qoyulub.
Bildirilib ki, məzarlıqda ümumilikdə 311 məzar var. Azərbaycanda isə İkinci Dünya müharibəsində əsir düşmüş hərbçilərin dəfn olunduğu 11 məzarlıq və 2986 məzar mövcuddur. Həmin məzarlıqlardan biri Sumqayıt şəhərində yerləşir.
Sumqayıtda dəfn olunan 311 əsirdən 269-u alman, digərləri isə avstriyalı və macar əsirlidir. Həmin əsirlər Sumqayıt şəhərinin salınmasında iştirak edib və müxtəlif səbəblərdən dünyasını dəyişərək burada dəfn olunublar.
Vurğulanıb ki, Alman əsgərlərinin məzarlığı daim diqqət mərkəzində saxlanılır və burada mütəmadi olaraq abadlıq-iməcilik işləri həyata keçirilir. Bu, Azərbaycanın tolerantlıq ənənələrinin bariz nümunəsidir. Tarixən olduğu kimi, Azərbaycan bu gün də müxtəlif xalqlara və dinlərə hörmətlə yanaşır. Bu dəyər müasir dövrdə daha da möhkəmlənərək milli və dini tolerantlığın "Azərbaycan modeli"nin formalaşmasına səbəb olub. Dövlət müstəqilliyindən sonra isə xalqımızın əsrlər boyu yaşatdığı bu dəyər dövlət siyasətinin əsas istiqamətlərindən birinə çevrilib.
