Sumqayıt Dövlət Universitetinin (SDU) rektoru Nurəli Yusifbəyli qəbul imtahanlarında hər iki mərhələnin cəminə görə III ixtisas qrupunda 690 bal toplayan sumqayıtlı abituriyent Fidan Hüseynzadəni və onun anası Zərifə Həsənovanı qəbul edib.
Sumqayit24.az xəbər verir ki, rektor, Fidan və onun kimi yüksək nəticə qazanan abituriyentlərin uğurlarının təkcə bir ailənin və ya şəhərin deyil, bütövlükdə ölkəmizin qürur mənbəyi olduğunu qeyd edib:
"Belə uğurların qazanılmasında abituriyentin özü ilə bərabər, ailəsinin və təhsil aldığı 12 saylı orta məktəb müəllimlərinin xidmətləri mütləq qeyd olunmalıdır".
Daha sonra abituriyentin universitet seçimi barədə danışan rektor seçim zamanı ali təhsil müəssisəsindəki mühitin gənclərin gələcək həyatında müstəsna rol oynadığını bildirib:
"SDU olaraq biz də öz fəaliyyətimizi elmi, strateji və innovativ yeniliklər üzərində qururuq".
Sonda abituriyentə SDU adından xatirə hədiyyələri təqdim olunub.
