Sumqayıt şəhər 37 nömrəli tam orta məktəbin 10-cu sinif şagirdi Mirnicat Mustafazadə Londonda keçirilən "TeenEagle" beynəlxalq ingilis dili olimpiadasında böyük uğura imza atıb. Dünyanın 75 ölkəsindən 300-ə yaxın şagirdin qatıldığı yarışda Mirnicat "Spelling" (orfoqrafiya) nominasiyası üzrə dünya birincisi olub.
Sumqayit24.az-ın əməkdaşı Mirnicat Mustafazadə dünya birincisi olan məktəbli ilə həmsöhbət olub. Müsahibədə o, yarışa hazırlıq prosesi, qazandığı uğur və gələcək hədəfləri barədə danışıb.
-"TeenEagle" beynəlxalq ingilis dili olimpiadasında dünya birincisi olduğunuz an hansı hissləri keçirdiniz?
Ölkəmi layiqincə təmsil edərək "Spelling" (orfoqrafiya) mərhələsində dünya birincisi, "Knowledge quiz " (ümumi bilik) və "Spelling" (orfoqrafiya) mərhələləri üzrə qızıl, "Writing" (yazı) və "Speaking" (şifahi nitq) mərhələləri üzrə isə ölkəmizə gümüş medal qazandırdığım üçün çox sevindim və qürurlandım.
-Yarışa hazırlıq prosesiniz necə keçdi? İngilis dilini inkişaf etdirmək üçün hansı üsullardan istifadə edirdiniz?
- Yarışa 8 ay ərzində hər gün ən azı 3 saat vaxt ayıraraq hazırlaşdım. İngilis dilini inkişaf etdirmək üçün xarici filmlərə baxır, yarışla bağlı materialları dəfələrlə oxuyub təhlil edirdim. Testlər həll edir, yeni sözlər öyrənərək onları cümlələrdə işlədir, esselər yazır və debat formatında çıxışlar edirdim.
-75 ölkədən yüzlərlə iştirakçının olduğu belə yarışda ən çətin mərhələ sizin üçün hansı oldu və niyə?
- Yarışda mənim üçün ən çətin mərhələ "Writing" (yazı) mərhələsi oldu. Çünki şagirdlərin öz fikirlərini yazılı şəkildə səlis və aydın ifadə etməsi o qədər də asan deyil.
- Bu uğurdan sonra qarşınıza hansı yeni hədəfləri qoymusunuz? Gələcəkdə hansı sahədə təhsil almağı və ya fəaliyyət göstərməyi düşünürsünüz?
London səfəri zamanı şəhərin ən gözəl yerlərini, həmçinin Oxford Universitetini ziyarət etdik. Oradakı ab-havanı çox bəyəndim. Gələcəkdə ADA Universitetinə qəbul olmaq və Oksford Universitetində magistr təhsili almaq istəyirəm. Daha sonra isə vətənimə qayıdıb ölkəmə olan borcumu ödəyərək peşə fəaliyyətimə başlamağı düşünürəm.
- Belə beynəlxalq yarışlarda uğur qazanmaq üçün yaşıdlarınıza və gənclərə nə tövsiyə edərdiniz?
Xarici dillərə maraq göstərməyi, xarici ədəbiyyatı mütaliə etməyi və biliklərini daha çox beynəlxalq olimpiada və yarışlarda sınamağı tövsiyə edərdim.
