Vətən müharibəsi qəhrəmanı, şəhid Mehrab Niftəliyevin doğum günüdür.
Mehrab Niftəliyev 1985-ci il mayın 13-də Quba rayonunun Qam-qam kəndində anadan olub. Ailəli idi. Üç övladı yadigar qalıb.
Mehrab Niftəliyev 2016-cı ilin 2-5 aprelində baş verən Aprel döyüşlərində də bir neçə ağır əməliyyatlarda iştirak edib və uğurlu döyüşçü kimi təltif olunub.
Azərbaycan Ordusunun baş giziri olan Mehrab Niftəliyev 2020-ci il sentyabrın 27-də başlanan Vətən müharibəsi zamanı Füzulinin, Cəbrayılın və Şuşanın azadlığı uğrunda gedən döyüşlərdə savaşıb. Gərgin savaşların birində yaralansa da, müalicəsini yarımçıq qoyaraq yenidən ön cəbhəyə qayıdıb. Şuşanın alınması əməliyyatında xüsusi şücaətlə döyüşən Mehrab noyabrın 8-də şəhidlik zirvəsinə ucalıb. O, Sumqayıt Şəhidlər xiyabanında torpağa tapşırılıb.
Prezident İlham Əliyevin Sərəncamlarına əsasən, Mehrab Niftəliyev "Vətən Müharibəsi Qəhrəmanı", "Vətən uğrunda", "Cəbrayılın azad olunmasına görə", "Şuşanın azad olunmasına görə", "Füzulinin azad olunmasına görə" medalları ilə təltif edilib.
